Crea a túa primeira web en poucos minutos con WordPress

A pasada semana, Iván Expósito, Responsable de Atención ao cliente da empresa de aloxamento web dinahosting, protagonizou o afterwork da Coruña. Durante pouco máis de 40 minutos explicounos os pasos a seguir para crear unha web con WordPress en poucos minutos.

Se non puideches asistir ao afterwork pero quedaches con ganas de saber todo o que se tratou, aquí che deixamos un completo resumo. Imos alá!

Empecemos polo principio. Que tres cousas precisa unha web?

1. Un nome de dominio, por exemplo, webexemplo.com
2. Un hosting que fará posible que a nosa web sexa visible en internet
3. Os ficheiros ou bases de datos que forman a nosa web

Que é WordPress?

WordPress é unha ferramenta gratuíta que nos permitirá construír webs sen apenas ter coñecementos en programación. Para que vexas o seu calado, é o CMS máis utilizado do mundo para montar webs e naceu mediante código aberto, isto quere dicir que é sostido e mellorado por unha gran comunidade de voluntarios e contribuídores.

Iván Expósito tamén nos comentou que a miúdo existe unha confusión entre WordPress.com e WordPress.org, pero non son o mesmo. WordPress.org refírese ao software que che permitirá montar a túa web baixo o teu propio dominio e hosting. Pola contra, WordPress.com permíteche ter unha web ou blog utilizando o hosting e dominio de WordPress.

A maioría dos provedores de hosting ofrecen WordPress preinstalado ou con opción de instalación en poucos clics.

Primeiros pasos

1. Ocúpate destes axustes básicos

• Título e descrición curta
• Axustes de idioma, data e hora
• Formato de URL e enlaces permanentes
• Instala un tema para a túa web

2. Páxinas, entradas e medios

• Páxinas: as seccións da nosa web
• Entradas: os artigos do noso blog
• A biblioteca de medios: o noso repositorio multimedia

3. Personalizar e maquetar

• Personalizar o tema
• Ocúpate de aprender como funciona Gutenberg e a personalización de contidos
• Non esquezas os widgets, para engadir opcións, personalizar e simplificar
• Instala plugins para o teu WordPress. Hainos que che axudarán a mellorar o SEO da túa páxina, a traducila e tamén hai ferramentas para enviar newsletters

Uns consellos finais

Iván rematou a súa presentación dándonos uns consellos finais.

1. Practica. Cambia de tema, instala novos plugins, maqueta e introduce contidos. Se te equivocas… volve empezar.
2. Documéntate. Internet está absolutamente abarrotado de titoriais e guías sobre WordPress. Aprende sobre deseño, sobre seguridade, etc.
3. Participa e comparte. A comunidade de WordPress está repleta de aficionados e profesionais que aportan os seus coñecementos. Participa en meetups, WordCamps e outros eventos da comunidade.
4. Persevera: WordPress, como aplicación, é a punta do iceberg dun sector de negocio enorme. Ofrece
   oportunidades a todo profesional coa constancia suficiente para especializarse no seu uso.

Graciñas Iván por esta charla tan interesante e práctica. E xa sabes, investiga e proba para construír a túa web perfecta!