Intelixencia artificial e Chatbots

O martes tivemos a oportunidade de escoitar a Fran Muiños, no Club Financiero Atlántico. Falounos de como os chatbots están presentes xa na nosa vida e de como as marcas aprenden a utilizalos e incluirlles intelixencia artificial (IA). O obxectivo é  que ademais de contestar preguntas simples, vaian aprendendo con cada interacción.

Muiños tamén incidiu na importancia dun bo chatbot para que non se produzan incongruencias como as que podemos encontrar en empresas tan coñecidas, como por exemplo New York Times (tras dar a baixa do servizo de suscripción, inmediatamente pregúntache se queres suscribirte).

Os chatbots están evolucionando, como diciamos o principio e agora aprenden porque levan un motor de intelixencia artificial. Este motor precisa de moitos datos de partida para poder dar cada vez mellores respostas ás peticions dos usuarios. Por isto, é indispensable a dixitalización das empresas.

Fran comentounos tamén que isto da IA xa vén de lonxe, concretamente dos anos 50 do século pasado, cando Alan Turing desenvolveu o machine learning ou do Deep Blue (o ordenador que xogou o xadrez contra Kasparov e lle gañou).

A automatización axuda a coñecer o teu cliente moi ben e a definir accións específicas para cada un deles. “A xente xa non busca información nas webs, senón que pregunta o que necesita a través das canles sociais” di Fran Muiños.

Mostrounos múltiples exemplos de chatbots que están a funcionar na actualidade e que utilizan intelixencia artificial: H&M, Sephora, Levi’s, Nike, etc.

E para rematar, Fran Muiños explicounos que o avance dos chatbots vén motivado pola elevada taxa de abandono do carriño da compra nos ecommerce. Estímase que o ano pasado producironse $4 trillóns de perdas por esta razón. Pola contra, agárdase que no 2020, os beneficios polo uso dos chatbots sexan de $600 billóns.

No ano 2017, o 34% das grandes marcas usaban ou ían usar chatbots. Namentres que no 2020 esta porcentaxe será do 80%.

Queda claro que os chatbots son e serán unha ferramenta moi importante para as marcas, e que a IA fainos moito mais eficaces ademais de que conseguen reducir custes.”