Visitamos o Centro Tecnolóxico de Cortizo

Visitar empresas que innovan, investigan e apostan polo coñecemento sempre é unha oportunidade para aprender. E iso foi precisamente o que vivimos na nosa recente visita ao Centro Tecnolóxico de Cortizo.

Da man de Javier Figueroa, responsable de Marketing, puidemos coñecer de primeira man este impresionante complexo formado por tres edificios que se inaugurou hai preto de dous anos. Un espazo concebido como centro de formación, investigación e showroom, deseñado por Miriam Cortizo, que reflicte á perfección a aposta da compañía pola innovación, o desenvolvemento de produto e a excelencia.

Durante a visita, Javier explicounos como unha empresa con presenza internacional necesita manter unha enorme capacidade de adaptación e resposta. Chamounos especialmente a atención o ritmo ao que evolucionan os seus catálogos de solucións en aluminio e PVC, incorporando constantemente novas prestacións, melloras técnicas e innovacións. Unha realidade que obriga aos seus equipos a traballar con gran axilidade e rapidez para responder ás necesidades do mercado.

Tamén descubrimos a dimensión internacional da compañía. Cada ano participan en arredor de seis feiras internacionais, levando consigo unha gran cantidade de materiais e elementos expositivos. Unha operativa loxística de gran complexidade que require a mobilización de numerosos tráileres para transportar todo o necesario desde Galicia ata distintos puntos do mundo.

Outro dos momentos especiais da visita foi percorrer o showroom de ventás. Alí puidemos comprobar como o deseño das ventás está fortemente condicionado pola cultura e os hábitos de cada país. Aspectos que para nós poden parecer imprescindibles non o son noutras partes do mundo. Un exemplo claro son as persianas, un elemento moi arraigado en España pero practicamente inexistente noutros mercados. De feito, aprendemos que, cando se queren instalar, a recomendación é situalas no exterior para optimizar prestacións e eficiencia.

A visita continuou pola nave destinada aos ensaios e controis de calidade, onde Cortizo verifica que todos os seus produtos cumpren rigorosamente coas prestacións e especificacións. Ver de preto os procesos de testaxe permitiunos entender mellor o nivel de esixencia técnica que hai detrás de cada solución.

Desde Markea queremos agradecer especialmente a Javier Figueroa a súa hospitalidade, a súa proximidade e o tempo que nos dedicou durante toda a visita. Foi un auténtico pracer coñecer de preto a realidade de Cortizo e descubrir todo o traballo que hai detrás dunha das compañías industriais de referencia do noso país.

Grazas por abrirnos as portas da vosa casa.